Елімізде Мемлекет басшысының бастамасымен «Келешек мектептері» ұлттық жобасы қарқынды түрде іске асырылуда. «Келешек мектептері» жобасының жүйелік шешімі - апатты және үш ауысымды мектептерді және қала мен ауыл арасындағы білім алшақтығын жою.
Аталмыш ұлттық жоба аясында жыл соңына дейін берілетін 100 жайлы мектептің бірі Алматы облысы, Іле ауданы, Ащыбұлақ ауылдық округі, Мұхамеджан Түймебаев ауылында №3 орта мектепте бір ауысымда 900 оқушы білім ала алады. Жаңа ғимарат білім есігін 2025 жылдың 01 қыркүйек күні ашады.
Бұл білім ордасында оқушы қажеттіліктеріне толық бағдарланған ыңғайлы және эргономикалық орта құру. Мұндай білім ошақтарында заманауи бейнебақылау және мектепке кіріп-шығуды қадағалау жүйелерін орнату арқылы балалар қауіпсіздігіне ерекше назар аударылады. Сонымен қатар бастауыш және жоғары сынып оқушыларына арналған блоктардың бөлек болуы қауіпсіз әрі жайлы ортаны қамтамасыз етеді.
Кедергісіз орта құру мақсатында пандустар, жеделсатылар, ерекше қажеттіліктері бар балалар еркін қозғала алатындай арнайы санитарлық бөлмелер қарастырылған. Ресурстық кабинеттер және мамандандырылған сыныптар бар.
Аталған жоба аясында салынған мектепбұрынғы типтік мектептерден едәуір ерекшеленеді. Жалпы аумағы 15–20%-ға үлкен, ал техникалық жабдықталу деңгейі төрт есе жоғары. Бұл мектепте робототехника кабинеті, STEM-зертхана, хореография залы, коворкинг аймақтары мен төрт спорт залға дейін қарастырылған.
Келешек мектептері – бұл жай ғана мектеп ғимараттары емес, бұл – болашаққа жасалған берік инвестиция. Білім – ұлттың іргетасы, ал бұл мектептер сол іргетасты нығайтатын басты тірек болмақ.