12 мамырдан бастап бес жасқа дейінгі балалары бар ата-аналар «Келешек» жүйесі аясында Отбасы банкінде AQYL білім беру жинақ салымын аша алады.
Еліміздегі мектеп жасына дейінгі балалар саны 2 миллионнан асады, бұл халықтың 10 пайызы. Олардың білім алуына қолдау көрсету мақсатында «Келешек» жүйесі енгізілді. Бұл жүйе отбасыларға балалардың оқуына қаржы жинауға мүмкіндік береді.
Energyprom мәліметінше, «Келешек» жүйесі бес жастан бастап балаларды қамти отырып, мемлекеттік бастапқы білім беру капиталын, жыл сайынғы мемлекеттік сыйақыны және инвестициялық табысты қарастырады. Бағдарламаның серіктестері ретінде мына банктер көрсетілген: Отбасы банкі, Halyk Bank, Jusan Bank, Нұрбанк, ВТБ Банкі; сондай-ақ мына сақтандыру компаниялары: «Евразия» сақтандыру компаниясы, Freedom Finance Life өмірді сақтандыру компаниясы, «Халык-Life», Standard Life, және Nomad Life.
Бұл шотқа мемлекет тарапынан бастапқы капитал аударылады – 60 АЕК (235 920 теңге), ал ата-ана қамқорлығынсыз қалған балалар үшін – 120 АЕК (471 840 теңге). Егер бала 2025 жылдың басына дейін бес жастан асқан болса, бастапқы капитал қарастырылмайды. Маңызды ескерту: «Келешек» бойынша жиналған қаражатты «Ұлттық қор – балаларға» жобасындағы қаржымен біріктіруге болады.
Бағдарлама 5 жастан бастап 18 жасқа дейінгі кезеңде балалардың атына қаржы жинауды тұрақты түрде жүргізуге арналған. Жиналған қаражатты ел ішінде де, шетелде де білім алуға – жоғары, техникалық және кәсіптік білімге – пайдалануға болады.
Мемлекеттен бастапқы капитал: биыл 5 жасқа толған балаларға – 60 АЕК (235 920 теңге); ата-ана қамқорлығынсыз қалған балаларға – 120 АЕК (471 840 теңге); екінші деңгейлі банктің сыйақысы немесе өмірді сақтандыру компаниясының инвестициялық табысы; жыл сайын 5–7% мөлшерінде мемлекеттік сыйақы төленеді. Шот ашылғаннан кейін ата-аналар балалар үшін жыл сайынғы ең төменгі жарнаны енгізуі керек: СУСН балалары үшін – 12 АЕК (айына шамамен 4 мың теңге), қалған балалар үшін – 24 АЕК.