Нашақорлық дендеп тұр
Нашақорлық тыйылмай тұр. Сондықтан да Ішкі істер министрлігі ата-аналарды сақ болуға шақырды, деп хабарлайды Almaty-akshamy.kz Алматы телеарнасының сайтына сілтеме жасап.
Есірткі қылмысына қарсы іс-қимыл департаментінің басқарма бастығы Бақытжан Әмірхановтың айтуынша, бүгінде дәріханаларда сатылатын сан алуан препараттың кейбірінің құрамында есірткі заты бар, кейбіреуінде жоқ. Соған қарамастан, олар адамды есінен адастырады. Мысалы, тропикамид пен цикломед сияқты көзге тамызатын дәрілерді де есірткі заты ретінде пайдаланады екен.
«Соның ішінде ең қауіптісі – «Трамадол» препараты. Бұл – синтетикалық опиодты анельгетик немесе синтетикалық героин. Дәл осы трамадолдан нашақорлық басталады. Оған тәуелді болған адамды бірден анықтау қиын. Себебі нашақор тұмаумен ауырғандай болады. Бір нәрседен уланғандай болып көрінеді. Жасөспірім препаратты пайдаланса, ата-ана байқамай қалуы да мүмкін», – деді ҚР ІІМ есірткі қылмысына қарсы іс-қимыл департаментінің басқарма бастығы Бақытжан Әмірханов.