Қазақстанда 1 шілдеден бастап отбасыға қатысты жаңа нысан пайда болады, деп хабарлайды aqshamnews.kz
Қазақстанда 1 шілдеден бастап елімізде отбасыға орналасудың жаңа түрі – "Кәсіби қабылдаушы отбасы" енгізіледі.
Оқу-ағарту министрлігі бұл уақытша шара балаларға қауіпсіз әрі жайлы үй жағдайын жасауға бағытталғанын айтты.
"Қабылдаушы кәсіби отбасылар бір уақытта төрт балаға дейін қабылдай алады. Әрбір балаға жеке көңіл бөлініп, қамқорлық көрсетіледі. Баланың мұндай отбасында болу мерзімі ең көп дегенде алты айды құрайды",- делінген ақпаратта.
Қабылдаушы кәсіби отбасыларға тек төрт санаттағы балалар ғана орналастырылады:
жетім балалар;
ата-анасының қамқорлығынсыз қалған балалар;
панасыз және қараусыз қалған балалар;
зорлық-зомбылықтан зардап шеккен балалар.
Ведомство ақпаратынша, қабылдаушы кәсіби отбасы болуға үміткерлер міндетті түрде жетім балаларға арналған арнайы ұйымдар мен балаларды отбасына орналастыруға көмектесетін аккредиттелген мекемелерде психологиялық дайындықтан өтеді.
Кандидаттарды тағайындау туралы шешімді қамқоршылық органдары қабылдайды. Бұл шешім ұсынылған құжаттардың толықтығы мен заң талаптарына сәйкес қабылданады.
Қабылдаушы кәсіби тәрбиешіге әр бала үшін ай сайын жәрдемақы және көрсеткен қызметі үшін қосымша төлем қарастырылған.
Айта кетейік, елімізде балаларды орналастырудың төрт түрі бар:
асырап алу,
қамқоршылық,
патронат,
қабылдаушы отбасы.
Министрлік балалар анықталған бойда интернат мекемелеріне емес, бірден отбасыларға жіберілетіндігін, бұл олардың отбасы жылуын сезінуіне мүмкіндік беретіндігін айтты.