Таразда жүргізуші куәлігінсіз көлік айдаған 17 жастағы жасөспірімге айыппұл салынды, - деп хабарлайды Aqshamnews.kz тілшісі.
Таразда кәмелетке толмаған жүргізуші рөлге заңсыз отырып, жол апатына себепкер болды. Оқиға 2025 жылдың тамыз айында тіркелген.
Полиция дерегінше, 17 жастағы жасөспірім Audi C4 көлігін жүргізуші куәлігінсіз айдап, жол қозғалысы ережесін бұзған. Соның салдарынан ол қарсы бағытта келе жатқан Volkswagen Jetta-ға соқтығысып, басқа жүргізуші жеңіл жарақат алған және оның көлігіне материалдық шығын келтірілген.
Сот ісі Қазақстан Республикасының Әкімшілік құқық бұзушылық туралы кодексінің 610-бабының 3-бөлігі бойынша қаралды.
Сотта жасөспірім кінәсін мойындап, келтірілген шығынды өтеуге дайын екенін жеткізді. Оның алғаш рет құқық бұзғаны және шын жүректен өкінгені жеңілдететін мән-жай ретінде ескерілді. Нәтижесінде сот оған 39 мың теңге көлемінде айыппұл салды.