Алматыда газ және өрт қауіпсіздігі мәселелері бойынша ауқымды түсіндіру жұмыстары жалғасуда. Бұл бастамаға құтқарушылармен бірге мәдениет пен спорт саласының танымал өкілдері қатысуда. Қалалық Төтенше жағдайлар департаментімен бірлесіп жүзеге асырылып жатқан акцияның мақсаты – көмірқышқыл газынан улануға байланысты қайғылы жағдайлардың алдын алу.
Алматылықтарға кезекті бейнеүндеуді әнші, актриса және тележүргізуші Дильназ Ахмадиева мен артист Біржан Хасанғалиев жолдады. Олар жеке үлгі көрсетіп, қарапайым әрі түсінікті формат арқылы өмірді сақтап қалуға көмектесетін қауіпсіздік ережелерін еске салды.
«Өзіңнен баста» челленджі аясында акция қатысушылары көмірқышқыл газын анықтайтын датчиктер мен табиғи газдың таралуына әсер ететін газанализаторлардың жұмысын көрсетті. Құтқарушылардың айтуынша, мұндай құрылғылар қауіпті дер кезінде байқап, қайғылы салдардың алдын алуға мүмкіндік береді.
ТЖД мәліметінше, көмірқышқыл газының басты қаупі – оның түсі де, иісі де жоқ. Ол бөлме ішінде көзге көрінбей жиналып, санаулы минуттар ішінде ауыр улануға немесе адам өліміне әкелуі мүмкін. Мұндай жағдайлар көбіне газ жабдықтарының ақаулығынан, газ құбырлары қосылыстарының герметикалығының бұзылуынан, желдету арналарының жабылып қалуынан, сондай-ақ тұрғын үйлерді жылыту үшін газ плиталары мен конфоркаларды пайдаланудан туындайды. Бұл әсіресе жеке тұрғын үйлерде жиі кездеседі.
Акцияға үш дүркін әлем чемпионы, жауынгерлік самбодан әлем кубогының иегері және бразилиялық джиу-джитсудан Азияның екі дүркін чемпионы Арман Оспанов та қосылды. Ол қазақстандықтарды үйлер мен пәтерлерге газ датчиктерін орнатуға шақырып, мұндай қарапайым құрылғылар өлімге әкелетін уланудың алдын алатынын атап өтті.
Бастаманы мәдениет пен өнер саласындағы өзге де танымал тұлғалар қолдады. Олар алматылықтарға газ жабдықтарының жағдайын тұрақты түрде тексеріп отырудың, желдету жүйесінің дұрыс жұмыс істеуін қадағалаудың және өрт қауіпсіздігінің қарапайым талаптарын сақтаудың маңыздылығын еске салды. Олардың айтуынша, қауіпсіздікке жауапкершілікпен қарау – өз өміріңе ғана емес, жақындарыңның өміріне де жасалған қамқорлық.