Бурабайда жоқ үйді жалға берген 17 жастағы жасөспірім ұсталды, деп хабарлайды Aqshamnews.kz тілшісі Polisia.kz-ке сілтеме жасап.
Қостанай облысы полиция департаментінің киберқылмысқа қарсы күрес басқармасы интернет-алаяқтық жасады деген күдікпен 17 жастағы жасөспірімді ұстады.
Тергеу деректеріне сәйкес, ол Бурабайда жалға берілетін үй туралы жалған хабарландырулар жариялап, сенген азаматтардан алдын ала төлем алған. Мысалы, бір жәбірленуші демалыс үйін «броньдау» үшін 60 мың теңге аударған, бірақ кейін күдікті байланысқа шықпай қойған.
Жедел іздестіру шарасы кезінде тәртіп сақшылары жалған хабарландыру жариялау үшін қолданылған телефонды тәркіледі. Қазіргі уақытта алаяқтық дерегі бойынша сотқа дейінгі тергеу жүріп жатыр. Сонымен қатар полиция күдіктінің өзге де ұқсас құқық бұзушылықтарға қатысы бар-жоғын тексеріп жатыр.
Құқық қорғау органдары азаматтарға ескерту жасады: үйді жалға алмас бұрын ақпараттың шынайылығын тексеріп, алдын ала төлем аударуға асықпау керек. Сондай-ақ заңды күшке ие жазбаша келісімшарт жасасқан қауіпсіз болады.