2024 жылдың 5 наурыз күні сағат 10:00-де Жол активтерінің ұлттық сапа орталығының жергілікті атқарушы орган өкілдеріне арналған оқу-семинары өтеді.
Семинар мақсаты - жергілікті мамандардың жол құрылысы саласындағы біліктілігін арттыру және автомобиль жолдарының сапасын арттыру. Аталған іс-шараға Алматы қаласының аудан әкімдіктері мен қалалық әкімдіктің 30-ға жуық қызметкері қатысады, деп хабарлайды Almaty-akshamy.kz.
Жол активтерінің ұлттық сапа ортылығының мәліметінше, Қазақстандағы тұрғын үй коммуналдық шаруашылы, жолаушылар тасымалы және автомобиль жолдары бөлімдеріндегі қызметкерлердің тек 10%-ы жол саласы мамандығын алған, дипломдары бар. Аталған салада арнаулы білім алмағандықтан жол құрылысы мен жөндеу жұмыстарында сметалық құжаттарды толтыруда, тапсырыс беруші тарапынан техникалық құжаттарды даярлауда олқылықтар орын алып, түрлі қателік кетеді. Осындай кемшіліктердің алдын алу үшін орталық мамандары жергілікті әкімдіктің жол саласына жауапты қызметкерлеріне оқу семинарын ұйымдастырған.
Семинарда төменде көрсетілген мәселелер қозғалады:
- Автожол жобаларындағы сапаны бақылау;
- Автомобиль жолдарына диагностика жасау және құжаттау;
- Ведомстволық сараптау, порталмен жұмыс;
- Орташа жол жөндеудің толық циклымен немесе бизнес процесімен танысу;
Осындай оқыту-семинарлардан кейін аймақтарда жол құрылысы сапасы артуы тиіс.
Іс-шара Алматы қаласындағы Шевченко, 97 мекенжайында орналасқан Логистика және көлік академиясында өтеді.