Жетісу облысында жалпы құны 9 миллион теңгеден асатын екі ірі мал ұрлығының фактісі анықталды, деп хабарлайды Aqshamnews.kz тілшісі.
7 маусым күні Көксу ауданына қарасты Мұқаншы ауылдық округінің жайылымынан белгісіз адамдар 9 бас ірі қараны ұрлап кеткен. Жәбірленушіге келтірілген шығын 2,5 миллион теңгеге бағаланған.
Бірнеше күннен кейін Алғабас ауылдық округінде тағы бір ұрлық тіркеліп, бұл жолы 14 бас ірі қара қолды болды. Мал иесіне келген шығын 7 миллион теңгеден асты.
Жедел-іздестіру барысында полиция қызметкерлері 51 және 37 жастағы екі күдіктіні ұстады. Екеуі де ауданның тұрғыны екені белгілі болды.
Күдіктілер ұрланған малды MAN маркалы жүк көлігімен тасымалдамақ болған. Көлік тоқтатылған кезде оның ішінен жоғалған 14 бас ірі қара табылды. Сонымен қатар, малды сатып алмақшы болған Алматы облысының тұрғыны да қолға түсті.
Аталған деректер бойынша ҚР Қылмыстық кодексінің мал ұрлығына қатысты бабымен іс қозғалды. Бұл бапқа сәйкес, 3 жылдан 7 жылға дейін бас бостандығынан айыру және мүлкін тәркілеу жазасы қарастырылған.
Қазіргі уақытта тергеу амалдары жалғасып жатыр. Полиция ұсталғандардың басқа да ұқсас қылмыстарға қатысы бар-жоғын анықтап жатыр.