Қазақстан Ауғанстандағы 6,3 балдық жойқын жер сілкінісінен зардап шеккендерге шұғыл медициналық көмекті жалғастырып жатыр. Президент тапсырмасымен гуманитарлық жүк пен дәрігерлер тобы аймаққа жіберіліп, қазірдің өзінде оқиға орнында жұмыс істеп жатыр, - деп хабарлайды Аqshamnews.kz тілшісі.
ҚР Денсаулық сақтау министрлігінің мәліметінше, мемлекеттік резервтен Ауғанстанға дәрі-дәрмек, хирургиялық құралдар, таңғыш материалдар, палаткалар, төсек-орын жабдықтары және өзге де шұғыл көмекке қажет құрал-жабдықтар жеткізілді.
Миссия құрамына тәжірибелі травматолог-ортопедтер, нейрохирургтер және шұғыл медицина мамандары кірген. Атап айтқанда:
-
Академик Батпенов атындағы Ұлттық ғылыми травматология және ортопедия орталығынан: О. Бекарисов, Д. Галым, А. Долгов, Р. Абилов, Б. Тұрлыбеков;
-
Ұлттық нейрохирургия орталығынан: С. Карибай, Н. Аширов, А. Қадыров;
-
Ұлттық шұғыл медицинаны үйлестіру орталығынан: А. Сатвалдин, С. Нұртазин, Р. Салимов, А. Кидірбаев, Г. Түсіпбеков.
Дәрігерлер жергілікті медицина қызметкерлерімен бірге науқастарды сұрыптап, операциялардың кезектілігін жоспарлауға көмектесіп, ең күрделі жағдайларға тікелей қатысып жатыр. Осы уақыт ішінде ондаған кеңес, тексеру және хирургиялық оталар жасалған.
Еске салайық, Ауғанстанда 2025 жылғы 3 қарашаға қараған түні магнитудасы 6,3 болатын күшті жер сілкінісі тіркелген еді. Қазақстан апат салдарын еңсеруге халықаралық қолдау көрсетіп, медициналық және гуманитарлық көмекті жүйелі түрде жеткізіп отыр.