Желтоқсан айы елімізде бірқатар маңызды өзгерістер мен жаңалықтарға толы болмақ, деп хабарлайды aqshamnews.kz.
Желтоқсан айында Қазақстандағы ұялы байланыс операторлары тарифтерді қайта қарастырады. Activ және Kcell операторларында баға 6%-дан 25%-ға дейін көтерілмек. Орташа алғанда, жаңа тарифтер 400 теңгеге дейін қымбаттайды. Операторлар бұл өзгерістерді инфляцияның әсерімен және қызмет сапасын жақсарту үшін қолға алынған шаралармен түсіндіреді. Сондай-ақ, желілерді жаңарту үшін қажетті жабдықтар бағасының өсуі және электр энергиясы тарифінің көтерілуі де бағаның артуына себеп болып отыр.
Желтоқсан айында жол қозғалысы ережелеріне жаңа өзгерістер енгізіледі. Енді, орташа жылдамдықты асыру жағдайлары үшін жүргізушілер айыппұл төлейтін болады. Бұл шара жол қауіпсіздігін арттыру және апаттардың алдын алу мақсатында енгізіліп отыр. Жаңа ережелер жолдардағы жағдайды бақылауды жеңілдетіп, жол қозғалысын реттеуге септігін тигізбек.
Қазақстанда 1 желтоқсаннан бастап автокөлік жүргізушілері өз көліктеріне қыстық дөңгелектерді салуға міндетті. Бұл талапты орындамаған жүргізушілерге айыппұл салынады. Қыстық дөңгелектерді уақытында салу жолда апаттар санын азайтып, қауіпсіздікті қамтамасыз етуге бағытталған шара болып табылады. Қысқы кезеңде ауа райының өзгеруі мен жолдардың тайғақ болуы апаттардың көбейюіне әкелуі мүмкін, сондықтан жүргізушілердің мұқият болуы қажет.
Желтоқсан айының екінші жартысында елімізде ауа райы күрт суытуы мүмкін. Кейбір өңірлерде температура -37 градусқа дейін төмендейді деп болжануда. Төтенше жағдайлар қызметі тұрғындарды сақ болуға және ауа райының өзгерістеріне дайын болуға шақырады. Мұндай суық ауа райы жол қозғалысына, сондай-ақ тұрмыс жағдайларына да әсер етуі мүмкін, сондықтан тұрғындарға қажетті сақтық шараларын қабылдау ұсынылады.