2025 жылғы 9 қыркүйекте Мемлекет басшысы Қасым-Жомарт Тоқаев Қазақстан халқына Жолдауында жасанды интеллектіні еліміздің стратегиялық дамуының басты құралы деп атады.
«Биылғы Жолдаудың біріктіруші идеясы – цифрландыруды кең көлемде дамыту және жасанды интеллектіні жаппай енгізу», – деді Президент.
Президент Қазақстанды үш жыл ішінде «жаппай цифрлық елге» айналдыру міндетін қойды. Ол үшін арнайы Жасанды интеллект және цифрлық даму министрлігін құру, заңнаманы жетілдіру және мектептерде ЖИ негіздерін енгізу көзделуде.
Жасанды интеллект тек мемлекеттік басқаруда емес, экономиканың барлық саласында қолданыс табады. Ол:
- мемлекеттік қызметтердің ашықтығын арттырады;
- денсаулық сақтау саласында ауруларды ерте анықтауға мүмкіндік береді;
- білім беруде жаңа буын мамандарын даярлауға ықпал етеді;
- өндірісте, энергетикада, логистика мен ауыл шаруашылығында тиімділікті арттырады.
Жасанды интеллект – адамзат дамуының жаңа кезеңін айқындайтын технология. Әлемдік тәжірибе көрсеткендей, ЖИ елдің бәсекеге қабілеттілігін арттырудың негізгі факторына айналып отыр. Қазақстан осы бағытта нақты қадамдар жасап, жастарды технологиялық сауаттылыққа үйретуді қолға алуда.
Президенттің бастамасы – Қазақстанды инновациялық даму жолына бастайтын шешуші стратегиялық бағдар. Жасанды интеллекті дұрыс пайдалану елдің экономикасын жаңа деңгейге көтеріп қана қоймай, қоғамның сапалы жаңаруына да жол ашады.