Қазақстан еңбек нарығы жаңа кезеңге қадам басты. Жасанды интеллект (ЖИ) технологиялары жұмыс орындарын толық жоймай, олардың мазмұны мен талаптарын түбегейлі өзгертуде, деп хабарлайды Aqshamnews.kz.
Еңбек ресурстарын дамыту орталығының директоры Ернат Жүнісовтің айтуынша, бұрын қолмен жасалатын жұмыс автоматтандырылып жатыр. Осыған байланысты кәсіби стандарттарға жаңа құзыреттер енгізілуде. Қазір сұранысы жоғары 8 мың мамандықтың 60%-ы жаңартылған кәсіби стандартпен қамтылып, олардың негізінде 11 мыңнан астам білім беру бағдарламасы өзектендірілген.
Сарапшы қысқа мерзімді қайта даярлау мен сертификаттау жүйесін дамыту қажет екенін атап өтті. Бұл мамандарға ЖИ құралдарын терең оқымай-ақ тиімді қолдануға мүмкіндік береді. Әлемдік тәжірибе бойынша, алдағы уақытта жұмыс істеп жүрген қызметкерлердің 50%-ы қайта даярлаудан өтуге мәжбүр болады.
HR кеңесші Әлия Мырзабекованың айтуынша, кәсіби стандарттарды дер кезінде жаңарту — еңбек нарығының басты шарты. Жаңа дағдыларды меңгермегендер бәсекеге қабілетсіз болып қалуы мүмкін. Болашақ икемділікке, үздіксіз оқуға және технологиялық сауаттылыққа тікелей байланысты.