Қорғаныс ведомствосы тарапынан қаза тапқандардың отбасыларына көмек көрсету бойынша барлық шаралар қабылданатын болады.
ҚР Қорғаныс министрлігі Жамбыл облысындағы инженерлік оқ-дәрілер қоймасындағы өрт салдарынан қаза тапқан әскерилердің аты-жөндерін жариялады, деп хабарлайды Almaty-akshamy.kz
Олар: келісімшарт бойынша қызметтегі әскери қызметші – 1981 жылы туған сержант Марат Сайлауұлы Мешінбай және 1981 жылы туған ефрейтор Руслан Жүрсінбайұлы Жанболатов, 1969 жылы туған әскерилендірілген күзет қызметшісі азамат Оразбек Дайырбекұлы Далибаев.
Сержант Марат Мешінбай мен ефрейтор Руслан Жанболатов өрттің алғашқы минуттарынан бастап әскери бөлімнің өрт сөндіру командасының құрамында болды. Жарылыстардың жанында болып, олар ауыр жарақаттар алды.
Әскерилендірілген күзет қызметшісі Оразбек Далибаев қойманы күзету жөніндегі қарауыл бастығының көмекшісі қызметін атқарды. Қызметтік міндеттерін атқаруда оқ-дәрілердің жарылуы салдарынан қаза тапты.
Қорғаныс министрлігі қаза болғандардың туыстары мен жақындарына қайғырып көңіл айтады.