Маңғыстау облысында Жаңаөзендегі мектеп оқушылары арасындағы жанжалға қатысты сот шешімі шықты, - деп хабарлайды Aqshamnews.kz тілшісі.
Оқиға әлеуметтік желіде тараған бейнежазбадан кейін үлкен қоғамдық резонанс тудырды. Видеода екі жасөспірім қыздың бір-бірін аяусыз соққыға жығып, төбелесті қатарластары мен кішкентай баланың көз алдында жалғастырғаны көрінеді.
Оқиға қалай болды?
Соттың мәліметінше, 2025 жылдың 8 қазанында сағат 21:00 шамасында Жаңаөзен қаласының көшелерінің бірінде екі жасөспірім қыз арасында жанжал туындап, төбелеске ұласқан. Қыздардың бірі түрлі жарақат алған. Оқиға куәгерлері түсірген видео Instagram желісінде жылдам тарап, қоғам мен құқық қорғау органдарының назарын аударды.
Анасына айыппұл салынды
Сот отырысы барысында қыздардың бірі тәрбиесіне жауапты анасының бала тәрбиелеу міндеттерін тиісті деңгейде орындамағаны анықталды. Бұл ҚР ӘҚБтК-нің 127-бабы 3-бөлігі бойынша әкімшілік құқықбұзушылық болып танылды.
Жауапкер әйел өз кінәсін мойындағанымен, жанжалды қарсы тараптың бірінші болып бастағанын айтты. Соған қарамастан, сот оны кінәлі деп танып, 78 640 теңге (20 АЕК) көлемінде айыппұл салды.
Шешім заңды күшіне енген жоқ
Сот үкімі әлі заңды күшіне енбеген. Аталған бап бойынша айыппұлдан бөлек, 10 тәулікке дейін әкімшілік қамауға алу шарасы да қарастырылған.
Сот өкілдері ата-аналар балалардың тәрбиесі мен мінез-құлқына жауапты екенін еске салды. Мұндай жағдайлардың жасөспірімдердің психологиялық жағдайына және қоғамдық тәртіпке теріс әсер ететіні атап өтілді.