Гранттың мөлшері – 400 АЕК немесе 1 572 800 теңге.
Бірінші лекте 4 500 адамды қамту көзделіп отыр, деп хабарлайды aqshamnews.kz
21 мамырдан бастап Business.enbek.kz порталында жаңа бизнес-идеяларды іске асыруға арналған мемлекеттік гранттарға өтінім қабылдау басталады.
Грантқа келесі азаматтар үміткер бола алады:
– жұмыссыз ретінде тіркелген тұлғалар;
– жеке кәсіпкер ретінде тіркелгеніне үш жылдан аспаған кәсіпкерлер.
Сонымен бірге үміткер әлеуметтік осал топтардың біріне жатуы тиіс (мүгедектігі бар азаматтар, көпбалалы отбасылар, қандастар және т.б.) және соңғы үш жыл ішінде «Бастау Бизнес» жобасы бойынша кәсіпкерлік негіздеріне оқып, сертификат алуы қажет.
Өтінім беру толықтай электронды түрде жүзеге асырылады: порталда тіркелу, бизнес-жоспарды толтыру және ЭЦҚ арқылы растау қажет.
Грант қаражатын бизнеске қажетті құрал-жабдық, мал, көшет, технологиялар сатып алуға және орын-жай жалдауға пайдалануға болады.