Қазақстанда құрастырылатын және импортталатын автомобильдерді сертификаттау үшін толыққанды сынақ орталығын құру мәселесі пысықталып жатыр. Бұл жайында Мәжіліс депутаттарының сауалына Премьер-Министрдің бірінші орынбасары Роман Склярдың жауабында айтылған, деп хабарлайды аlmaty-akshamy.kz Kazinform-ға сілтеме жасап.
«Қазақстандық кәсіпорындар еуропалық сертификаттау орталықтарымен бірлесіп, Қазақстанда құрастырылатын және импортталатын автомобильдерді сертификаттау үшін толыққанды сынақ орталығын құру мәселесін қарастырып жатыр. Сынақ орталығын құру көлік құралдарын сертификаттау, жол-полигон, климаттық, стендтік және басқа да зертханалық сынақтарды жүзеге асыруды көздейді», - деді Роман Скляр жауабында.
Оның атап өтуінше, қазіргі уақытта осы жобаны қаржыландыру мәселелері пысықталып жатыр.
«Сондай-ақ мораторийді енгізу бойынша қабылданған іс-шаралар шетелдік өндірушілердің дайын автокөлік құралдары мен машина жиынтықтарын Қазақстан нарығына жеткізуді үздіксіз жүзеге асыруға мүмкіндік бергенін және көлік құралдарының тапшылығының туындау мүмкіндігін жоққа шығарғанын атап өтеміз. Осылайша, шұғыл және жедел қызметтерді шақыру жүйесімен жабдықтау бойынша мораторийдің қолданылуын тоқтату жөнсіз деп санаймыз», - деді ол.