Тараз қаласының әкімшілік құқықбұзушылық жөніндегі мамандандырылған соты 12 оқушының тамақтан улануына қатысты істі қарап, жеке кәсіпкерге айыппұл салды, - деп хабарлайды Аqshamnews.kz тілшісі.
Оқиға былтыр қарашада Байзақ ауданында болған: дүкеннен бургер алған 12 оқушы улану белгілерімен ауруханаға түскен. Жоспардан тыс тексеру кезінде тағам үлгілерінен ішек таяқшалары тобының бактериялары анықталып, өнімді дайындауда санитарлық талаптардың бұзылғаны белгілі болды.
Сотта кәсіпкер кінәсін ішінара мойындап, "бір мезетте 12 бала улануы мүмкін емес" деп уәж айтқан. Оның сөзінше, дүкенге күніне үш бургер ғана жеткізіледі.
Дегенмен сот жеке кәсіпкерді ӘҚБтК-нің 425-бабы 2-бөлігі бойынша кінәлі деп танып, 1,2 млн теңге айыппұл тағайындады. Айыппұл көлемі 30%-ға қысқартылды. Кәсіпкердің қарамағында 9 қызметкер барын ескерген сот дүкен қызметін тоқтатпау туралы шешім қабылдаған.
Сот қаулысы заңды күшіне енді.