Жамбыл облысында полиция 40 жастағы Шу қаласының тұрғынын қатыгездікпен өлтіру фактісі бойынша тергеу жүргізіп жатыр, деп хабарлайды Аqshamnews.kz тілшісі КТК арнасына сілтеме жасап.
Телеарна мәліметінше, әйел бірнеше күн бойы туғандарымен байланысқа шықпаған. Алматыдан келген ұлы анасын өз пәтерінде өлі күйінде тауып алған. Марқұмның денесінде пышақ жарақаттары болып, қатты зақымданғаны анықталған.
Полицияның хабарлауынша, жедел іздестіру шараларының нәтижесінде күдікті ретінде Шуға қарасты ауданның 35 жастағы тұрғыны ұсталды. Ол қаза тапқан әйелмен бұрыннан таныс болғаны белгілі, алайда қылмыстың себебі әзірге жария етілмей отыр.
«Полиция қызметкерлері Шу ауданының 35 жастағы тұрғынын күдікті ретінде ұстап, уақытша ұстау изоляторына қамады. Қазіргі уақытта қылмысты жан-жақты, толық және объективті тергеуге, сондай-ақ барлық мән-жайды анықтауға бағытталған қажетті тергеу әрекеттері жүргізіліп жатыр», – деп хабарлады полиция.