Жамбыл атындағы Қазақ мемлекеттік академиялық филармониясының 90 жылдығы аясында Төлепберген Әбдірашев атындағы ҚР Мемлекеттік академиялық симфониялық оркестрінің «ХХ-25» атты фестивалінің ашылу концерті өтті.
Халыққа классикалық өнерді насихаттауды мақсат еткен филармонияда екінші рет өтіп жатқан фестивальдің мақсаты - ХХ ғасырдағы және заманауи композиторлардың симфониялық шығармаларын жарыққа шығару, өткен ғасырда туған идеялардың бүгінгі күнмен үндесуін паш ету, деп хабарлайды aqshamnews.kz.
Биылғы фестивальдің басты мақсаты - шет елдердегі ЖОО білім алып, жұмыс істеп, бүгінгі күні шет мемлекеттерде етене танылып үлгерген қазақ жастарының Қазақстанға келіп өнер көрсетіп, тыңдармандарға өнерлерін насихаттау. Фестиваль-концертте Қанат Омаровтың жетекшілігіндегі Т.Әбдірашев атындағы ҚР Мемлекеттік академиялық симфониялық оркестрінің сүйемелдеуінде арнайы Бельгиядан шақырылған халықаралық байқаулардың лауреаты, скрипкашы Меруерт Карменова өнер көрсетті.
Халықаралық байқаулардың лауреаты, скрипкашы Меруерт Карменова:
«Жамбыл атындағы Қазақ мемлекеттік академиялық филармониясының мерейтойлық жылында өнер көрсету – мен үшін зор мәртебе болды. Бұл кеште мен Кароль Шимановскийдің №1 скрипкаға арналған концертін Қазақстан Республикасы Мемлекеттік академиялық симфониялық оркестрінің сүйемелдеуімен, маэстро Қанат Омаровтың дирижерлік етуімен орындадым. Айта кетерлігі, бұл туынды Қазақстанда алғаш рет орындалды. Кештің ерекше атмосферасы, оркестрдің жоғары кәсібилігі мені қатты тәнті етті және жадымда ұзақ сақталатыны сөзсіз. Филармония ұжымына, оркестр әртістеріне, маэстро Қанат Омаровқа және менің өнерімді ыстық ықыласпен қабылдаған барлық тыңдарманға шын жүректен алғыс білдіремін. Осындай рухани кешке қатысу мен үшін үлкен шабыт пен қуаныш сыйлады».
Концерттік бағдарламада әлемдік симфониялық өнердің таңдаулы туындылары ұсынылды. Филармонияда өткізілген кезекті іс-шара – дәуірлер мен ұрпақтар үнінің тоғысқан тұсы, өнер арқылы салынған рухани көпірдің нағыз көрінісі болды. «ХХ25» фестивалі алдағы 13,21 маусым күні концерттік бағдарламамен жалғасын табады.
