2024 жылы ҚР ПІБ Медициналық орталығы ауруханасының Ядролық медицина орталығы үш инновациялық радиофармпрепаратты өндіріске енгізді. Бұл туралы орталық басшысы, медицина ғылымдарының докторы Айгүл Сәдуақасова мәлімдеді, деп хабарлайды aqshamnews.kz
Радиоизотоптық зерттеулер саны 40%-ға артып, 12 мыңнан астам талдау жүргізілді. Қазақстанда алғаш рет 18F-FDG, 18FAT, 68GA-API препараттары өндірілді. Бұл дәрілер онкологиялық ауруларды ерте анықтауға мүмкіндік беріп, ағзадағы қатерлі ісік жасушаларын, ми, бауыр, өкпе және басқа да мүшелердегі ісіктерді дәл диагностикалауға көмектеседі.
Препараттар пациенттер үшін қауіпсіз, себебі олар денеден тез шығады және нақты ақпарат береді. Бұл онкологтарға науқастың жағдайын дәлірек бағалауға мүмкіндік береді.
2025 жылы тағы екі жаңа препарат – 18F-PSMA және 68Ga-PSMA өндіріске енгізіледі. Бұл технологиялар ерлер арасындағы онкологиялық аурулармен күресуде маңызды рөл атқарады.
2022 жылы ашылған орталық Қазақстанда ядролық медицинаның дамуына серпін беріп, жаңа диагностикалық және емдеу әдістерін енгізуде.