Мәжіліс депутаттарының бастамасымен әзірленген мәдениет, білім беру, отбасы және мемлекеттік бақылау мәселелері жөніндегі заң жобасына өзгерістер мен толықтырулар екінші оқылымда қабылданды.
Аталған заң жобасы 2025 жылғы 26 ақпанда бірінші оқылымнан өткен болатын, - деп хабарлайды Aqshamnews.kz.
Жаңа заң нормаларына сәйкес, халықаралық ғылыми жоба байқауларында жүлделі орын алған мектеп оқушыларына бір реттік ақшалай төлемақы беріледі. Сонымен қатар, осы оқушыларды дайындаған педагогтерге де қаржылай өтемақы қарастырылған.
Бұл бастама еліміздің білім саласындағы дарынды балалар мен олардың тәлімгерлерін ынталандыруға бағытталған.
Әлеуметтік жеңілдіктер де қарастырылған
Сонымен қатар, заң жобасында мүгедек баланы тәрбиелеп отырған немесе І топтағы мүгедек адамды күтетін жоғары оқу орны түлектерін мемлекеттік білім беру грантын өтеуден босату ұсынылады.
Сондай-ақ, шетелдік ЖОО-ларда резидентура, магистратура, аспирантура немесе докторантурада оқыған азаматтарға грантты өтеу мерзімін кейінге шегеру мүмкіндігі беріледі. Бұл – білім алушылардың әлеуметтік жағдайын ескере отырып қабылданып отырған қолдау шарасы.
Жаңа түзетулер еліміздегі білім беру жүйесін дамытуға, дарынды жастарды қолдауға және әлеуметтік әділеттілікті арттыруға бағытталған.