Қазақстан Республикасының Ұлттық орталық музейінде көрнекті әзербайжан ғалымы, кілемші-суретші, Халық суретшісі Лятиф Керимовтың 120 жылдығына арналған «Халық өнеріндегі уақыт тынысы» атты көрменің ашылу рәсімі өтті, – деп хабарлайды aqshamnews.kz тілшісі.
Көрме Түркі мәдениеті және мұрасы қорының, Әзербайжан Республикасы Мәдениет министрлігінің, Қазақстан Республикасы Мәдениет және ақпарат министрлігінің, Әзербайжан ұлттық кілем музейінің және Қазақстан Республикасының Ұлттық орталық музейінің ұйымдастыруымен өткізілді.
Экспозицияда XIX–XX ғасырлардағы әзербайжан кілем және халық өнерінің үлгілері – Губа, Баку, Ширван, Қарабақ, Қазақ және Гәнжә кілемдері, сондай-ақ түксіз кілемдер, сәндік-қолданбалы өнер туындылары, көркем кестелер, зергерлік және металл бұйымдар, ұлттық әйелдер киімдері ұсынылған.
Көрменің жеке бөлімі Лятиф Керимовтың шығармашылық мұрасына арналған. Мұнда шебердің эскиздері, сондай-ақ «Екінші көктем» және «Хатаи» кілемдері қойылған.
Іс-шара аясында Әзербайжан ұлттық кілем музейі мен Қазақстан Республикасының Ұлттық орталық музейі арасында музейаралық ынтымақтастықты дамытуға, тәжірибе алмасуға және мәдени мұраны зерттеу мен дәріптеу саласындағы бірлескен жобаларды жүзеге асыруға бағытталған ынтымақтастық туралы меморандумға қол қойылды.
Сондай-ақ Лятиф Керимовтың 120 жылдығына және қазақ пен әзербайжан сәндік-қолданбалы өнерінің тарихи-мәдени байланыстарына арналған дөңгелек үстел өтті.
«Халық өнеріндегі уақыт тынысы» көрмесі 2026 жылғы 4 қазанға дейін жалғасады.