Грузия аумағында заңды өкілдерінің қарауынсыз және тиісті күтімсіз қалған жеті жастағы қазақстандық отанына қайтарылды. Бұл туралы ҚР Оқу-ағарту министрлігі мәлімдеді, – деп хабарлайды aqshamnews.kz тілшісі.
Баланы елге жеткізу және құжаттарын рәсімдеу жұмыстары жарты жыл бойы жүргізілген.
Бұған дейін кәмелетке толмаған бүлдіршін шет мемлекетте қараусыз қалып, уақытша мамандандырылған мекемеге орналастырылған болатын. Қазіргі таңда қыз бала қауіпсіз жерде, оған қажетті психологиялық көмек көрсетіліп жатыр. Министрлік баланың мүддесін ескере отырып, оны отбасы мүшелеріне беру мәселесін қарастыруда.
«Кәмелетке толмаған бала шет мемлекеттің аумағында заңды өкілдерінің тиісті күтімі мен қарауынсыз қалған, ол уақытша мамандандырылған мекемеге орналастырылды. Қазір қыз бала қауіпсіз жағдайда, оған қажетті психологиялық көмек көрсетілуде», — делінген ресми хабарламада.
Ведомство өкілдері ақпараттың құпиялылығына сүйеніп, баланың шетелге қалай тап болғанын және неліктен туғандарының қасында болмағанын жарияламады. Қазіргі уақытта баланың алдағы тағдыры мен туыстарына тапсырылу процесі бақылауға алынған.