Өзбекстан Республикасының президенті Шавкат Мирзиёев Ташкентте World Boxing халықаралық федерациясының президенті Геннадий Головкинді қабылдады, деп хабарлайды Aqshamnews.kz тілшісі.
Кездесу барысында тараптар олимпиадалық боксты дамыту, халықаралық ынтымақтастықты нығайту және ортақ жобаларды іске асыру мәселелерін талқылады. Головкин Өзбекстанның Азиядағы боксты дамытудағы рөліне ерекше тоқталып, елдің әлемдік және құрлықтық деңгейдегі жарыстарды ұйымдастыру тәжірибесін атап өтті.
Сонымен қатар, тараптар спорт нысандарын дамыту, олимпиадалық қозғалыс аясындағы өзара ынтымақтастықты жүйелеу және ортақ жобаларды жүзеге асыру бағыттарын талқылады.
Головкин жылы қабылдауы үшін алғысын білдіріп, федерацияның Өзбекстанмен ынтымақтастықты жалғастырып, өңірде боксты дамытуға арналған жобаларды жүзеге асыруға дайын екенін айтты. Айта кетейік, Геннадий Головкин Ташкентте жұмыс сапарымен жүр және бұған дейін Азия Олимпиадалық кеңесінің Бас ассамблеясына қатысқан болатын.