NASA: 1 000 002 021 жылға қарай Жер өмір сүруге жарамсыз болуы мүмкін
Жапон ғалымдары NASA мамандарымен бірлесіп жүргізген зерттеу нәтижелері бойынша, шамамен бір миллиард жылдан кейін Жер планетасы тіршілікке жарамсыз күйге түсуі мүмкін, - деп хабарлайды Aqshamnews.kz тілшісі
Зерттеушілердің айтуынша, уақыт өте келе Күннің жарықтығы мен температурасы біртіндеп артады, бұл өз кезегінде мұхиттардың булануына және Жердің атмосферасының бұзылуына әкеледі.
Алайда ғалымдар қауіпті өзгерістер бұдан да ертерек байқалуы ықтимал екенін ескертеді. Мысалы, экстремалды күн дауылдары атмосфера құрамына әсер етіп, оттегі деңгейін күрт төмендетуі мүмкін. Мұндай жағдайда планетаның беті тіршілік үшін қолайсыз ортаға айналады.
Мамандардың пікірінше, бұл мәселеден шығудың бір жолы - жабық автономды экожүйелерді құру және Күн жүйесінен тыс өмірге жарамды ғаламшарларды іздеу. NASA сарапшылары технология дамуының арқасында адамзат Күннің әсерінен қорғану тәсілдерін таба алады және Жердегі өмірдің жойылу уақытын айтарлықтай кейінге шегере алады деп сенеді.