Мәжіліс төрағасы Ерлан Қошанов «Халықпен бірге» қағидасының Мемлекет басшысының саясатының негізгі өзегіне айналғанын атап өтті. Оның айтуынша, қоғамды алаңдатқан барлық өзекті мәселе Мәжіліс қабырғасында ашық талқыланып, біртіндеп шешімін табуда.
"Конституциялық соттың құрылуы – құқық үстемдігін қамтамасыз етудегі маңызды қадам" деп атап өткен Ерлан Қошанов бұл институттың азаматтардың құқықтарын қорғаудағы рөлін ерекше атап өтті. Сонымен қатар, ол Қазақстанның халықаралық саяси үдерістерде маңызы артып келе жатқанын жеткізді.
Ұлттық құрылтайдың мәніне тоқталған Мәжіліс төрағасы:
"Ұлттық құрылтай – жай ғана форум емес, түрлі пікірлер айтылатын маңызды алаң. Депутаттар Мемлекет басшысы көтерген әлеуметтік мәселелердің шешімін табу жолында бірлесіп жұмыс істеп жатыр" – деді.
Сондай-ақ, халықтың жергілікті билікке деген сенімі артып келе жатқанын айтып:
"Қазіргі уақытта тұрғындардың сайланған әкімдерге деген сенімі бұрынғыдан да күшейді" – деді.
Елімізде жүзеге асырылып жатқан саяси реформалар мен әлеуметтік бастамалар халықтың әл-ауқатын жақсартуға бағытталған нақты әрі жүйелі қадам екені сөзсіз.