Енді елімізде азаматтарға бос жұмыс орындары туралы дербестендірілген ұсыныстар беретін жасанды интеллект-агент (ЖИ-агент) пайда болады. Бұл туралы Үкімет отырысында Цифрлық даму министрлігі Еңбек және халықты әлеуметтік қорғау министрлігіне ұсыныс тастады, деп хабарлайды Аqshamnews.kz.
Вице-министр Асқар Биахметовтің айтуынша, жаңа технологияны енгізу арқылы әрбір азаматтың жеке профилі мен еңбек нарығындағы трендтерге сүйене отырып, оларға сәйкес келетін жұмыс орындары немесе оқыту курстары автоматты түрде ұсынылатын болады.
“Қазіргі уақытта біз ең заманауи технологияларды - ЖИ-агентті қолдану мүмкіндігін қарастырып отырмыз. Біздің цифрлық өнімдеріміз еңбек нарығындағы қажеттілікті анықтап, азаматтарға нақты ұсыныстар жасай алады”, - деді Асқар Биахметов.
7 800-ден астам сұранысқа ие мамандық
Еңбек министрлігінің мәліметінше, елімізде еңбек нарығында 7 800-ден астам мамандық сұранысқа ие. Осы қажеттілікті білім беру жүйесімен ұштастыру мақсатында кәсіби стандарттарға сай оқу бағдарламалары жаңартылып жатыр. Қазірдің өзінде 11 мыңнан астам оқу бағдарламасы жаңартылып үлгерді.
Цифрлық банк және ИИ негізіндегі стандарттар
Мемлекеттік органдар "Цифрлық дағдылар банкін" енгізуді бастап кетті. Бұл бастама келешекте жасанды интеллектті кәсіби стандарттарды әзірлеу үдерісіне енгізуге жол ашады. Биахметовтің айтуынша, бұл өзгерістер еңбек нарығындағы ахуалды жедел талдауға, стандарттарды уақтылы жаңартуға және рутиналық процестерді қысқартуға мүмкіндік береді.
Айта кетейік, бүгін, 29 шілдеде Үкімет отырысында ҚР Еңбек және халықты әлеуметтік қорғау вице-министрі Асқар Биахметов Қазақстандағы жұмыссыздық деңгейі 4,6 пайыз екенін мәлімдеді. Оның айтуынша, елдегі жалпы жұмыспен қамтылған халық саны – 9,2 миллион адам.
Сонымен қатар, ведомство өкілі қазіргі еңбек нарығының құрылымы мен жинақтаушы зейнетақы жүйесіне қатысу деңгейі бірқатар қауіптерге алып келетінін атап өтті. Атап айтқанда, жұмыс істейтін азаматтардың 30 пайызы болашақта ең төменгі зейнетақы мөлшеріне ғана үміт арта алады.