Қазақстандықтар арасында "депрессия кезінде еңбекке жарамсыздық парағын рәсімдеуге бола ма?" деген сұрақ талқыланып жатыр. Бұл мәселеге қатысты Денсаулық сақтау министрлігі түсініктеме берді, деп хабарлайды Aqshamnews.kz тілшісі.
Денсаумин жауабы
Министрлік өкілдері ең алдымен «депрессия» диагнозын психиатр ғана қоятынын еске салды. Ал бастапқы белгілерді жалпы практика дәрігері немесе психолог анықтауы мүмкін.
Ведомствоның мәліметінше, егер дәрігер пациенттің жағдайы уақытша жұмысқа қабілеттілігін шектейді деп есептесе, жеңіл дәрежедегі депрессия кезінде еңбекке жарамсыздық парағы ашылуы мүмкін.
Ал орта және ауыр дәрежелі депрессия кезінде науқас стационарлық ем алуы тиіс, бұл – министрлік стандарттарында көрсетілген талап.
Депрессияны қалай анықтайды?
Бұдан бұрын психиатр Наби Есимов депрессия диагнозын қою үшін үш негізгі критерий бар екенін түсіндірген:
-
көңіл-күйдің екі аптадан кем емес уақыт бойы тұрақты төмен болуы;
-
ойлау белсенділігінің төмендеуі – зейіннің нашарлауы, қарапайым есептеулерді қиын орындау;
-
қозғалыс белсенділігінің төмендеуі – жұмысқа баруға қиналу, төсектен тұруға құлықсыздық.
Министрлік дерегі бойынша, депрессия – дәрігер бақылауын қажет ететін медициналық жағдай, ал еңбекке жарамсыздық парағы нақты клиникалық жағдайға байланысты беріледі.