Қазақстанда «Үздік туристік ауыл-2025» ұлттық байқауының қорытындысы жарияланды. Бұл байқау ауылдық аумақтардың бірегей табиғи ландшафттары мен дәстүрлерін, қолөнерін сақтап қалуға және оларды ілгерілетуге бағытталған, деп хабарлайды aqshamnews.kz
Байқауға қатысу үшін облыс әкімдіктері әр аймақтан үш ауылды ұсынуға мүмкіндік алды. Іріктеу кезінде табиғи және мәдени ресурстарға, сондай-ақ ауылдардағы дәстүрлі қызмет түрлерінің сақталуына ерекше назар аударылды.
Байқау қорытындысы бойынша Қазақстанның ең үздік 5 туристік ауылы анықталды:
- Лепсі (Жетісу облысы, Алакөл ауданы)
- Нағи Ілиясов (Қызылорда облысы, Сырдария ауданы)
- Хан Ордасы (Батыс Қазақстан облысы, Бөкей ордасы ауданы)
- Поперечное (Шығыс Қазақстан облысы, Риддер ауданы)
- Шабанбай би (Қарағанды облысы, Ақтоғай ауданы)
Бұл ауылдар өздерінің табиғи сұлулығы мен мәдени мұрасын сақтай отырып, туристерді қызықтыратын ерекше орындарға айналуда. Айта кетсек, 2023 жылы Алматы облысындағы Саты ауылы халықаралық деңгейде ең үздік туристік ауыл ретінде танылып, беделді UNWTO сыйлығымен марапатталған болатын.