Қарағанды облысы мен Шымкентте тұрғын үйді жалдау ақысына мемлекеттен қолдау алуға өтініш берген 2300-ден астам отбасының 913-і ауқатты болып шықты, деп хабарлайды Aqshamnews.kz тілшісі.
Еңбек және халықты әлеуметтік қорғау министрлігінің мәліметінше, былтыр аталған екі өңірде азаматтардың әл-ауқатын бағалайтын скорингтік модель пилоттық түрде енгізілген. Осы кезеңде 27 мыңнан астам өтініш түскен.
Ведомствоның хабарлауынша, «тұрғын үй көмегін тағайындау», «жеке тұрғын үй қорынан жалға алынған баспананың жалдау ақысының бір бөлігін субсидиялау» және «мүгедектігі бар балаларды үйде оқыту шығындарын өтеу» қызметтері бойынша шешім қабылдауда осы модель қолданылып келеді. Соның ішінде жалдау ақысының бір бөлігін субсидиялауға 2 356 өтініш түсіп, тексеру нәтижесінде 913 отбасының ауқатты екені анықталған.
Сондай-ақ 2025 жылғы 1 қыркүйектен бастап мүгедектігі бар балаларды үйде оқыту шығындарын өтеу қызметіне өтініш қабылдау басталып, барлығы 1 741 өтініш тіркелген. Ұпайлау қорытындысы бойынша оның 44-і ауқатты отбасылар санатына жатқызылған.