Дарын Мубаровтың «Уақыт көрсетеді» каналына берген сұхбатында домбыра туралы пікірі көпшіліктің назарын аудартты.
Нұрсейіт Жылқышыбайдың “Ырымға сенесіз бе?” деген сұрағына ол өзінің діни қағидаларын айтып өтті. Ол маңдайының сәждеге тигеніне 30 жылдан астам уақыт өткенін және өзінің негізгі өлшем бірлігінің Алланың сөзі және пайғамбардың өсиеті екенін атап өтті. Сонымен қатар, ол ырымға сенбейтінін де айтты.
Журналистің домбыра, айтыс, күй-терме харам ба деген сұрағына жауап бере отырып, Дарын Мубаров музыкалық аспаптарға дінде рұқсат берілмегенін айтты. Ол кеңес үкіметі құлаған кезде «әлем» деген кітапта Дина Нұрпейісова туралы әңгіме бар екенін және Дина апамыздың да домбыраның дұрыс емес екенін білгенін, бірақ жалғастыра бергенін еске алды. Дарын Мубаров домбыра тарту қарапайым халық үшін зиян болмауы мүмкін екенін, бірақ молда адамға бұл дұрыс емес екенін айтты.
Сонымен қатар, діни маман ретінде ол Ханафи мазхабында домбыраның рұқсат етілмейтінін ескертіп өтті. Бұл сөздің артында үлкен діни негіз бар екенін жеткізді.