Өтініш қабылдау 25 қазан – 10 қараша аралығында Ұлттық тестілеу орталығының app.testcenter.kz сайтында жүргізілді.
Бүгін басталған сынақ 2 желтоқсанға дейін жалғасады, деп хабарлайды Almaty-akshamy.kz
Докторантураға түсу емтихандарына 1060 адам қатысады.
"Түсу емтиханына эссе жазу, докторантураға дайындық тесті және білім беру бағдарламасы тобының бейіні бойынша емтихан кіреді.
Жалпы, түсу емтиханының ең жоғары көрсеткіші 100 балл, оның ішінде әңгімелесу – 20 балл, эссе – 10 балл, докторантурада оқуға дайындығын анықтауға арналған тест – 30 балл, бейіні бойынша емтихан сұрақтары – 40 балды құрайды.
Ал мемлекеттік білім беру тапсырысы бойынша конкурсқа қатысу үшін және ақылы негізде докторантураға түсу үшін шекті балл 75 балды құрайды", – деп атап өтті Ұлттық тестілеу орталығының директоры Руслан Емелбаев.
Атап өтсек, 2022 жылдан бастап докторантураға түсу үшін шет тілін меңгергендігі туралы сертификаттан бөлек, ҚАЗТЕСТ жүйесі бойынша мемлекеттік тілді меңгергенін растайтын сертификатты ұсыну қажет.
Түсу емтиханының нәтижелері оны өткізгеннен кейін келесі күні жарияланады. Оны жеке кабинетте көруге болады. Докторантураға түсетін азаматтарға 700-ден астам грант бөлінген.