Димаштың Stranger концерті 2022 жылдың 23 қыркүйегінде Алматының Орталық стадионында өтеді
14 шілдеде әлемге танымал қазақстандық әнші Димаш Құдайбергеннің алғашқы жеке концертіне билет сатыла бастады.
Dimashnews.com ақпараты бойынша, алғашқы 15 минут ішінде әртістің 36 елдегі жанкүйерлері билет сатып алған. Димаш өзінің Instagram ресми аккаунтында Dears-ке алғысын жеткізіп, оларды туған елінде асыға күтетінін айтты.
«Билет сатылымы басталғаны хабарланған соң 15 минут ішінде әлемнің 36 елінен тыңдармандарым билет сатып алды. Бүгін – билет сатылымының екінші күні. Одан да көп қонақтар болады деп үміттенемін. Мені қолдағандарыңызға көп рақмет! Баршаңызды жақсы көремін. 23 қыркүйекте Алматыда кездескенше!» – деп жазды әнші.
Димаштың Stranger концерті 2022 жылдың 23 қыркүйегінде Алматы қаласының Орталық стадионында өтеді. Билеттерді мына сілтемеден сатып алуға болады.