Димаш Берлинде алғаш рет жеке концерт өткізді: «Stranger» әлемдік туры Германияда жалғасты, деп хабарлайды Aqshamnews.kz тілшісі.
14 қарашада Германия астанасы Берлинде Димаш Құдайбергеннің жеке концерті өтті. Бұл – қазақстандық әншінің Берлиндегі алғашқы өнер көрсетуі. Бұған дейін ол 2022 және 2024 жылдары Дюссельдорфта концерт берген.
Max-Schmeling-Halle аренасында Димаш 20-дан астам композиция орындады. Олардың ішінде он авторлық әні де болды. Кештің басты шығармаларының бірі ретінде әрдайым айтылатын «Ұмытылмас күн» тағы да көрерменнің ерекше ықыласына бөленді. Бұл ән 2016 жылғы алғашқы турының атауына айналған және содан бері әр концерттің ажырамас бөлігі болып келеді.
Он жыл ішінде әлемнің түкпір-түкпіріндегі тыңдармандары «Ұмытылмас күнді» жатқа меңгеріп, әр концертте Димашпен бірге жүректен шығарып орындайды. Әр әншінің концерті тыңдарман үшін дәл сол «ұмытылмас күнге» айналады.
Ән орындалған сәтте көрермендер мыңдаған шам іспетті жарықтарды көтеріп, залды ерекше атмосфераға бөледі. «Махаббат шамдары» деп аталған бұл әсерлі акцияны Dimash Fanclub Deutschland ұйымының жанкүйерлері ұйымдастырып, алты мыңға жуық жарықшамды көрермендерге таратқан.
Кеш өнер, эмоция және ерекше энергетикаға толы болды.