Қару ұрлау және сақтау фактісі бойынша 519 тергеу амалы жүргізілді
Қаңтардағы жаппай тәртіпсіздіктерге А.Жұмагелдиевтің (Дикий Арман) «Қазақстандық» және «Айшуақ-Жантүгел» топтарының қатысы бары анықталды. Бұл туралы ҚР Бас прокуратурасы 1 қызмет бастығының орынбасары Елдос Қилымжанов мәлім етті, деп хабарлайды Almaty-akshamy.kz ҚазАқпаратқа сілтеме жасап.
«Бұған дейін хабарланғанымыздай, құзырлы органдар қаңтардағы жаппай тәртіпсіздікке қылмыстық топ мүшелерінің қатысқанын анықтады. Ол - Арман Жұмагелдиевтің (Дикий Арман) «Қазақстандық» және «Айшуақ-Жантүгел» топтары. Олардың қылмыстық әрекетінен азаматтар зардап шекті, қаза болғандар да бар. Ұйымдасқан қылмыстық топтың 24 мүшесі жазаға тартылды», - деді Елдос Қилымжанов орталық коммуникациялар қызметі алаңында өткен баспасөз мәслихатында.
Сондай-ақ, Бас прокуратура өкілі жаппай тәртіпсіздіктер кезінде ұрланған қаруға қатысты мәліметпен бөлісті.
«Қару ұрлау және сақтау фактісі бойынша 519 тергеу амалы жүргізілді. Ол бойынша 183 тұлға күдікке ілініп, 154 адам сотталды. Жаппай тәртіпсіздіктер кезінде 10 аңшылық дүкені тоналып, ол жерден 1 672 мылтық ұрланды. Одан бөлек, 1 288 қызметтік қару қолды болды. Ұрланған қарулардың үштен бірі (958 қару) табылды. Бүгінде 2 мыңнан астам қару әлі бөгденің қолында. Оның қатарында гранаталар, автоматтар, мылтықтар, тапаншалар мен граната атқыштары бар. Сонымен қатар азаматтар өз еркімен 119 қаруды тапсырды», - дейді ол.
Айта кетейік, аталған ведомство қаңтар оқиғасы кезінде 238 адамның қаза тапқанын тағы бір нақтылады.