Алматыда Қазақстанның халық әртісі, Мемлекеттік сыйлықтың иегері Жүсіпбек Елебековтың 120 жылдығына арналған ІІ Республикалық колледжаралық дәстүрлі әншілер байқауы өтіп жатыр.
Байқау Мәдениет және ақпарат министрлігінің қолдауымен Жүсіпбек Елебеков атындағы республикалық эстрада-цирк колледжінде ұйымдастырылып отыр. Республикалық іс-шара Жүсіпбек Елебеков ескерткішіне гүл шоқтарын қоюдан басталды. Байқаудың алғысөзін айтқан ҚР еңбек сіңірген қайраткері, колледж директоры Жеңіс Сейдоллаұлы іс-шара мақсаты Жүсіпбек Елебековтың шығармашылығын кеңінен насихаттап, ұрпақтан-ұрпаққа жеткізу екенін атап өтті.
– Жүсіпбек Елебеков атындағы байқау екінші рет өткізіліп жатыр. Ол – еліміздің тарихындағы бірегей тұлға. Байқауды өткізудегі мақсатымыз – дәстүрлі әнді жоғалтпай, ұрпақтар сабақтастығын жалғастырып, оны жастарға жеткізу. Бұл кісілердің мұрасын қазіргі жастар біліп, әрі қарай жалғастырып кетулері керек. Сол кезде біздің еліміздің болашағы жарқын болады, – деді Жеңіс Сейдоллаұлы.
Байқау басталмай тұрып барлық қатысушылар мен іс-шара қонақтарына Жүсіпбек Елебеков туралы «Бірегей» атты қысқаша деректі фильм көрсетілді. Сондай-ақ, екі күнге созылған байқау күндері ҚР халық әртісі Рамазан Стамғазы, ҚР мәдениет саласының үздігі Шолпан Даржан, ҚР мәдениет қайраткері Армат Ислямгалиев, Қазақстанның еңбек сіңірген қайраткері Нұржан Жанпейісов шеберлік дәрістерін өткізді. Екінші күні Республикалық колледжаралық дәстүрлі әншілер байқауы Ықылас атындағы халық музыкалық аспаптар музейінде өтті.
Айта кеткен жөн, Жүсіпбек Елебеков атындағы республикалық эстрада- цирк колледжінің тарихы – ХХ ғасырдың 60-шы жылдарынан бастау алады. КСРО аумағында Мәскеу мен Киев эстрада студияларынан кейінгі үшінші, ал республика көлемінде алғашқы болып шаңырақ көтерген білім ордасының қалыптасып шыңдалуына, қазақ мәдениетінің айтулы тұлғалары, Қазақстанның халық әртістері: Жүсіпбек Елебеков, Ғарифолла Құрманғалиев, Кәукен Кенжетаев, Ыдырыс Ноғайбаев, Бақыт Қарабалина, Бекен Жылысбаев, Хабидолла Тастанов, Фатима Балғаева, Мағауия Хамзин, Зейнеп Қойшыбаева, Нұрғиса Тлендиев және т.б. өнер саңлақтары зор үлес қосты.
1967 жылы Гүлжихан Ғалиеваның жетекшілігімен студияның алғашқы түлектерінен елімізде алғашқы «Гүлдер» эстрадалық жастар ансамблі, сондай-ақ, «Қазақ мемлекеттік циркі», «Мемлекеттік қуыршақ театры» құрылды. 1992 жылы студияға училище мәртебесі және «Қазақстанның халық артисі» Жүсіпбек Елебековтың есімі беріліп, 3 жылдық оқу мерзіміне көшірілді. Ал 1995 жылы оқу-білім ордасы қазіргі заман талабына сай колледж мәртебесіне ие болды.