Алматы облысының Еңбекшіқазақ аудандық көпсалалы ауруханасында маңызды кездесу өтті.
Бұл жолы ақ халатты абзал жандар тек емдеу емес, қоғамның қауіпсіздігі туралы да сөз қозғады. Жиынның басты тақырыбы – діни экстремизмнің алдын алу, деп хабарлайды aqshamnews.kz.
Іс-шара ұйымдастырушысы – Дін саласындағы мәселелерді зерттеу орталығы. Мақсат – дәрігерлердің құқықтық сауатын арттырып, сыни ойлау қабілетін дамыту арқылы радикалды тұжырымнан қорғануға көмектесу.
Бас спикер ретінде дінтанушы, АТТ мүшесі Әбдіхамитов Бақдәулет Халиуллаұлы сөз сөйледі. Ол радикалды ағымдардың белгілерін нақты мысалдармен түсіндіріп, олардың адамдарды қалай арбайтынын және соған қарсы қандай тәсілдер қолдануға болатынын баяндады.
Жиын барысында интернет арқылы белгісіз тұлғалардан білім алу қаупі де кеңінен сөз болды. Ақпараттық кеңістіктегі радикалды ықпалдан қорғанудың маңыздылығы ерекше атап өтілді.
Кездесу соңында қатысушылар осындай шаралар дәрігерлердің экстремизмге қарсы иммунитетін қалыптастырып, қауіп-қатерге төтеп беруге көмектесетініне сенім білдірді. Қоғамдық тұрақтылықты сақтау – әр азаматтың ортақ міндеті екенін тағы бір мәрте көрсетті.