Алматы әкімі Дархан Сатыбалды жұмыс сапарымен Полиция департаментіне барды. Сапар барысында ол ішкі істер органдарының қызметімен, департамент ғимараттарында жүргізіліп жатқан жөндеу жұмыстарының барысымен, сондай-ақ жергілікті бюджет есебінен алынған жаңартылған техникамен танысты.
Қауіпсіздікті арттыруға және полиция жұмысының тиімділігін көтеруге бағытталған заманауи автокөліктер мен арнайы құралдар көрсетілді.
Әкім сондай-ақ Полиция департаментінің Жедел басқару орталығында (ЖБО) болып, бейнебақылау жүйесінің жұмысымен және қоғамдық тәртіпті қамтамасыз етуде цифрлық технологияларды енгізу барысымен танысты.
Алматыдағы ЖБО 2000 жылдың желтоқсанында ашылып, Қазақстандағы алғашқы орталық болды. Бүгінде мұнда тәулік бойы 28 қызметкер жұмыс істейді. Жүйеге 53 мың камера қосылған, олардың ішінде бет-әлпетті тану функциясы бар құрылғылар да бар. Иелерінің келісімімен мұндай технологиялар ойын-сауық орындарында — барлар мен мейрамханаларда да орнатылады. Олар құқық бұзушылықтың алдын алуға және іздеуде жүрген азаматтарды анықтауға қолданылады. Жыл соңына дейін Target платформасына тағы 8 мың камераны қосу жоспарланған.
Дархан Сатыбалды қала тұрғындарының қауіпсіздігі басты басымдық екенін атап өтіп, полицияның материалдық-техникалық базасын нығайтудың және халықтың құқық қорғау органдарына деген сенімін арттырудың маңыздылығын баса айтты.
Департаментті аралауға қала әкімі аппаратының басшылары, Алматы мәслихатының депутаттары және Полиция департаментінің басшылық құрамы қатысты.