Әкім суретшінің ұлттық сәндік-қолданбалы өнер дәстүрін заманауи көркемдік ойлау жүйесімен шебер ұштастыра білуін айрықша атап өтті, – деп хабарлайды aqshamnews.kz тілшісі.
"Көрнекті суретші, гобелен шебері Бәтима Зәуірбекованың 80 жылдығына арналған «Мұра жіптері» атты мерейтойлық көрмеге бардым. Бәтима Есмұратқызы ұлттық гобелен өнерінің дамуына зор үлес қосты. Оның шығармаларында қазақ халқының тарихы мен мәдениеті, ұлттық дәстүр, туған жер табиғаты, отбасы құндылығы мен ұрпақ сабақтастығы көрініс тапқан. Бәтима Есмұратқызын 80 жылдық мерейтойымен құттықтап, көп жылғы еңбегі, өнерге деген адалдығы және қазақ мәдениетінің дамуына қосқан қомақты үлесі үшін алғыс білдірдім", деп жазды шаһар басшысы өзінің инстаграм парақшасына.
Суретші шығармашылығының басты ерекшелігі – ұлттық сәндік-қолданбалы өнер дәстүрін заманауи көркемдік ойлау жүйесімен шебер ұштастыра білуінде. Бәтима Зәуірбекова өзіндік қолтаңбасын қалыптастырған дарынды суретші. Оның туындылары Қазақстанда және шетелдерде көрмеге қойылып, халықаралық қауымдастыққа қазақтың гобелен өнерін таныстырып келеді.
Биыл тамызда Мемлекет басшысы Қасым-Жомарт Тоқаев өнер саласына сіңірген еңбегі үшін Бәтима Зәуірбекованы «Отан» орденімен марапаттады.