Алматыда қала әкімі Дархан Сатыбалдының төрағалығымен, Қалалық ардагерлер кеңесінің президиумы мүшелерінің қатысуымен Қарттар күніне орай кездесу өтті, - деп хабарлайды Аqshamnews.kz тілшісі.
Әкім ардагерлерді мерекемен құттықтап, олардың еңбегіне, тәжірибесіне және құндылықтарға адалдығына зор ризашылығын білдірді.
«Біздің қоғамда аға буынға деген шынайы құрмет – жай ғана дәстүр емес, мәдениетіміз бен ұлттық санамыздың маңызды бөлігі», – деді Дархан Сатыбалды.
Әкімнің айтуынша, ардагерлер – баға жетпес өмірлік тәжірибенің иелері, олар рухының мықтылығымен үлгі болатын жандар.
«Сіздердің еңбек пен төзімдеріңіздің және сенімдеріңіздің арқасында Алматы да, бүкіл Қазақстан да бүгін мақтан тұтар деңгейге жетті. Біз сіздер бастаған істі жалғастырып, жеткен жетістікті еселеп, жаңа даму көкжиегін ашып келеміз», – деп атап өтті қала басшысы.
Дархан Сатыбалды қарттарды әлеуметтік қолдауға арналған іс-шаралар туралы кеңінен айтты. 2022 жылдан бері Алматыда «Белсенді ұзақ өмір» жобасы табысты жүзеге асуда. Оның аясында құрылған Белсенді ұзақ өмір сүру орталығы жылына 500 мыңға дейін қызмет көрсетеді.
Сонымен қатар, «Алтын жас» бағдарламасы жұмыс істеп тұр. Ол зейнеткерлерге үш жыл мерзімге жұмысқа орналасуға мүмкіндік береді. Жалақының бір бөлігі жергілікті бюджет есебінен төленеді. Осының арқасында 1 мыңнан астам адам тұрақты жұмысқа орналасты.
Қалалық ардагерлер кеңесін қолдау үшін Ішкі саясат басқармасы арқылы үш жылдық жоба жүзеге асырылуда, сондай-ақ қызметтік автокөлік мәселесі шешілді. Мыңға жуық қария санаторий-курорттық емделуге мүмкіндік алды.
Әкім қарт тұрғындарды әлеуметтік және медициналық қызметпен сапалы қамтамасыз ету басты міндет екенін атап өтті.
«Ардагерлерімізді қолдау, оларға лайықты өмір сүру жағдайын жасау – қоғамдағы абыройлы орнын қамтамасыз ету – біздің қасиетті борышымыз», – деді Дархан Сатыбалды.
Мегаполис басшысы жауапты басқармалар мен аудан әкімдеріне Қарттар айының аясында мәдени, спорттық және білім беру іс-шараларын күшейтуді, Ардагерлер кеңесімен өзара іс-қимылды нығайтуды тапсырды.