Алматы әкімі Дархан Амангелдіұлы Сатыбалды филология ғылымдарының кандидаты, Абайтанушы-ғалым Базарбек Атығайға Қазақстан Республикасының Президенті Қасым-Жомарт Кемелұлы Тоқаевтың құттықтау хатын табыс етті.
Мемлекет басшысы ғалымға ұлы Абайдың 180 жылдығы қарсаңында «Абай» баспасынан жарық көрген қазақтың кәсіби көркем аудармасының бастауындай Абай мектебінің көрнекті өкілдері Шәкерім Құдайбердіұлы, Әсет Найманбайұлы, Уәйіс Шондыбайұлы, Тұрағұл Абайұлы, Даниял Ысқақовтардың көркем аудармаларына ғылыми тұрғыда теориялық, текстологиялық талдау жасаған «Абайдың аударма мектебі» атты ғылыми еңбегі, Құнанбай әулетінің бір жұрнағы, қазақтан шыққан тұңғыш қаржыгер, ағартушы, аудармашы Даниял Ысқақовтың шығармалары жинағы мен Шәкерім Құдайбердіұлы өмірінің соңғы кезеңдеріне байланысты, әсіресе, оның қазаға ұшырайтын уақытын қамтитын оқиғаларға, естеліктерге, архив мұрағаттарына, мақалаларға шолу жасау арқылысалыстырмалы зерттеу жұмысы жанрында жазылған «Шейіт» кітабы үшін құттықтау хатын жіберген еді.
Қала әкімі ғалымға мықты денсаулық, отбасына амандық, ісіне береке, шығармашылық табыстар тіледі.