«Dara» Президенттік бастамалар қоры Қамқоршылық кеңесінің шешімімен Қордың президенті қызметіне Әлия Адамбаева тағайындалды.
Әлия Адамбаева медиа саласында, сондай-ақ мемлекеттік және қаржы секторларында 25 жылдан астам кәсіби тәжірибеге ие маман.
Әр жылдары ол бірқатар басшылық лауазымдарды атқарды, соның ішінде «Алматы қаласын дамыту орталығы» АҚ Басқарма төрағасының орынбасары және Басқарма мүшесі, Қазақстан Республикасы Ұлттық Банкі баспасөз қызметінің Ақпарат және коммуникациялар департаментінің директоры, «Орталық коммуникациялар қызметі» РММ директорының орынбасары, сондай-ақ Алматы қаласы әкімінің кеңесшісі болды. Бұған дейін Қазақстанның жетекші іскерлік және қоғамдық-саяси бұқаралық ақпарат құралдарында басшылық және редакторлық қызметтер атқарған.
«Журналистика» мамандығы бойынша жоғары білімі бар, экономика және бизнес магистрі, сондай-ақ MBA және Executive MBA дәрежелеріне ие.