"Бурабай" мемлекеттік ұлттық табиғи паркі туристік және рекреациялық жобаларды іске асыру үшін жер учаскелерін ұзақ мерзімге жалға беретінін мәлімдеді, деп хабарлайды Aqshamnews.kz тілшісі.
Ұлттық парктің хабарлауынша, бұл қадам Бурабай курорттық аймағында қонақ үйлер, этноауылдар және демалысқа арналған өзге де туристік нысандар салуға мүмкіндік береді.
Бастама Қасым-Жомарт Тоқаевтың жаңа туристік аумақтарды дамыту жөніндегі тапсырмасына сәйкес қолға алынған. Жобалар аясында «Ақбура», Жүкей көлі, Қатаркөл және Текекөл аумақтарын дамыту көзделіп отыр. Осы мақсатта ұлттық парк туристер сирек баратын, бірақ әлеуеті жоғары орындарды іріктеп, инвесторларға арналған жер телімдерін дайындауда.
Ұлттық парк жер учаскелері қолданыстағы заңнамаға сай, экологиялық талаптар мен ерекше қорғалатын табиғи аумақтардың қорғау режимдерін сақтай отырып берілетінін атап өтті. Жерді беру тәртібі мен жалға алу шарттары туралы толық мәлімет парктің ресми сайтында жарияланатыны айтылды.