"Қайрат" пен "Брюгге" матчінде қоғамдық тәртіп бұзған Бельгияның бірнеше жанкүйері әкімшілік қамауға алынды, деп хабарлайды Аqshamnews.kz тілшісі.
Қалалық соттың баспасөз қызметінің мәліметінше, Астана қаласының мамандандырылған әкімшілік құқықбұзушылықтар жөніндегі сотына Бельгия азаматтары С., Д., Н.-ға қатысты ұсақ бұзақылық дерегімен (ҚР ӘҚБтК 434-бабы 1-бөлігі) іс түскен.
Сот материалдарында көрсетілгендей, 2026 жылғы 20 қаңтарда олар "Астана Арена" стадионының трибуналарында мас күйінде киімдерін шешіп, іш киіммен қалып, айқайлап, жұрттың назарын өздеріне аударуға тырысқан. Осы әрекеті қоғамдық тәртіптің бұзылуына себеп болған.
Сот отырысында шетелдік азаматтар кінәларын мойындап, болған жағдайды эмоциямен байланыстырды. Құқықбұзушылық фактісі бейнежазбалармен расталған.
Нәтижесінде сот қаулысымен С., Д., Н. кінәлі деп танылып, әрқайсысына 5 тәулік әкімшілік қамау жазасы тағайындалды.