Еліміз тәуелсіздікке қол жеткізіп, дербес мемлекетке айналғанымызға 33 жыл толуына орай Алматыдағы 107 лицейде «Тәуелсіздік – тірегім» атты мерекелік кеш ұйымдастырылды.
Іс-шараға еліміздің тәуелсіздігі мен елдігін жырына арқау етіп жүрген айтулы ақын, халықаралық «Алаш» әдеби сыйлығының лауреаты, С. Мұқанов пен Ғ. Мүсірепов атындағы мемлекеттік әдеби-мемориалдық музей кешенінің директоры Әділғазы Қайырбеков құрметті қонақ ретінде шақырылды. Мерекелік кешке лицей директоры Үмітхан Ақатанұлы, оның орынбасарлары Бақтыгүл Досынбекова мен Ғибрат Жапбасбаева бастаған ұжым мүшелері, ұстаздар мен оқушылар қатысты.
Алғашқы сөз кезегі Әділғазы Жақсылықұлына берілді. Ол ел тәуелсіздігі мен желтоқсан оқиғасы туралы терең ой қозғап, сол кезеңдегі өз естеліктерімен бөлісті. Ақынның «Желтоқсан жаңғырығы» поэмасынан үзінді оқып беруі жиналғандарға ерекше әсер етті. Сонымен қатар ол желтоқсан оқиғасының қаһармандарының бірі, қазіргі Мәжіліс депутаты Нұртай Сабильянов туралы жазған кітабынан сыр шертті. Қатысушылар ақынның әр сөзін ұйып тыңдады.
Кеш барысында тарих пәнінің мұғалімі Айгүл Жұмабекованың жетекшілігімен лицейдің 8-сынып оқушылары желтоқсан оқиғасы мен қаһармандары туралы қойылым қойды. Шәкірттердің дайындық деңгейі жоғары болды, қойылым көрермендерді ерекше әсерге бөледі. Желтоқсан оқиғасының драмалық көріністері жиналғандардың жүрегін толқытып, жанын тебірентті.
Сонымен қатар, мерекелік кеш аясында оқушылардың «Жас ұлан» ұйымына қабылдау рәсімі өтті. Талапкерлер патриоттық сезіммен ант қабылдап, Отанын сүюге, мемлекеттік рәміздерді құрметтеуге, үлкенге құрмет, кішіге ізет көрсетуге серт берді. Ақын Әділғазы Қайырбеков пен лицей директоры Үмітхан Ақатанұлы «Жас ұланға» қабылданған оқушыларға төсбелгі мен галстук тағып, оларға ақ жол тіледі.
Кеш соңында лицей директоры Үмітхан Ақатанұлы қорытынды сөз сөйлеп, көрнекті ақын Әділғазы Қайырбековке алғыс білдірді. Ақынға иығына шапан жауып, шығармашылық табыс тіледі. Өз кезегінде Әділғазы Жақсылықұлы да лицей ұжымына ризашылығын білдіріп, өзінің «Жандауа» жыр жинағын сыйға тартты.
Мерекелік кеш лицей оқушыларының өнер көрсетулерімен жалғасты. Күмбірлеген күй, сызылған ән, шабытты жыр жиналған қауымды рухтандырып, кешті ерекше әсерлі етті.
Бұл кеш – тәуелсіздігіміздің қымбат екенін сезіндіретін, рухани азық сыйлаған мазмұнды әрі мағыналы шара болды.