Қазақстанның Қаржы мониторингі агенттігі "BizBirgemiz" жобасының құрылтайшысы Перизат Қайратты көктемгі су тасқынынан зардап шеккендерге жиналған 1,5 миллиардтан астам теңгені жымқырды деп айыптап, тергеу жүргізіп жатыр, деп хабарлайды aqshamnews.kz.
Қаражат қымбат көліктер, элиталық пәтерлер мен шетелде демалысқа жұмсалған.
«Ағымдағы жылдың көктемінде ол елордадағы автосалондардан Mercedes-Benz S450 (88 млн теңгеге), Lexus LX-600 (80 млн теңгеге) және Haval (39 млн теңгеге) сияқты премиум-класс көліктерін сатып алған. Сол кезеңде Астанадағы Akbulak Riviera, Highvill Ishim Gold, «Көк Жайлау» тұрғын үй кешендерінен (паркинг орындарын қоса алғанда), сондай-ақ Vela Village коттедж қалашығынан 600 млн теңгеге элиталық жылжымайтын мүлік сатып алды. Сонымен қатар, Қазақстанның бейжай қарамайтын азаматтарының қайырымдылық қаражаттары есебінен Перизат К. бірнеше рет Дубай, Доха, Лондон және Ыстамбұл қалаларына демалуға шығып, St. Regis, Shangri-La, Palazzo Versace және Kempinski сияқты бес жұлдызды қонақ үйлерде тұрған. Осы елдерде ол Cartier және Louis Vuitton брендтерінің қымбат әшекейлері мен аксессуарларын сатып алып, қымбат мейрамханаларға барып, яхтада теңіз серуендерін ұйымдастырған», – делінген хабарламада.
Алаяқтық әрекеттері дәлелденсе, бұл жағдай қайырымдылыққа деген сенімге зиян келтіруі мүмкін.