Елімізде жаздық дақылдарды жаппай егу басталды. Бұл туралы Үкімет отырысында ауыл шаруашылығы министрі Айдарбек Сапаров мәлімдеді, деп хабарлайды aqshamnews.kz
Ол бүгінгі күні жаздық дақылдарды жаппай егу басталғанын, бұл ретте барлық өңірлер егу жұмысына кіріскенін атап өтті. АШМ деректері бойынша барлығы 3,7 млн гектар, оның ішінде дәнді дақылдар – 2 млн гектар, жемшөп – 300 мың гектар, майлы дақылдар – 888 мың гектар, көкөніс-бақша дақылдары және картоп – 195 мың гектарға егілді. Мақта мен қант қызылшасын себу жұмысы аяқталып қалды.
«Күздік дақылдарға келетін болсақ, 2025 жылдың егініне күздік дәнді дақылдар 405,7 мың га алаңға егілді. Олардың 74%-ы жақсы, ал 23%-ы қанағаттанарлық жағдайда», — деп нақтылады Айдарбек Сапаров.
Сонымен қатар спикердің айтуынша, оңтүстік өңірлерде ерте пісетін көкөністерді жинау басталды. Атап айтқанда, Түркістан облысында 1,2 мың гектар алқаптан 38,3 мың тонна қырыққабат жиналды.
Биыл 580 мың тоннаға жуық ерте пісетін көкөніс жинау жоспарлануда, бұл жаңа өнім жинауға дейінгі маусымаралық кезеңде ішкі нарықтың қажеттілігін қамтамасыз етуге мүмкіндік береді.
