Қуандық Бишімбаевтың туысы Бақытжан Байжанов бүгін, 22 шілдеде бостандыққа шығады. Бұл туралы оның адвокаты Ғазиз Ынтықбаев айтты, – деп хабарлайды aqshamnews.kz тілшісі.
Адвокаттың айтуынша, сот отырысында Байжановқа қатысты амнистия актісін қолдану мәселесі қаралған.
«Сот оны дереу босату туралы қаулы шығарды. Жазасының өтелмеген бөлігі үш айдан сәл астам уақытты құрады. Бүгін Бақытжан отбасына оралады», – деді қорғаушы.
Бақытжан Байжанов жазасын Ақмола облысының Степногорск қаласындағы қауіпсіздігі орташа мекемеде өтеп келген.
Еске салайық, Байжанов Салтанат Нүкенованың өліміне қатысты іс бойынша аса ауыр қылмысты жасырды деп айыпталған. 2024 жылғы 13 мамырда Астана қаласының қылмыстық істер жөніндегі мамандандырылған ауданаралық соты оны кінәлі деп танып, төрт жылға бас бостандығынан айырған.
Сот процесінде Байжанов мейрамханадағы бейнебақылау камераларының жазбасын өшіруге тапсырма бергенін мойындаған. Алайда ол жасалған ауыр қылмыс туралы білмегенін айтқан.
Кейін адвокаттар үкімге апелляциялық шағым түсіргенімен, 2024 жылғы 26 маусымда сот үкімді өзгеріссіз қалдырды.
2025 жылы Конституцияның 30 жылдығына байланысты қабылданған рақымшылық туралы заң аясында Байжановтың өтелмеген жаза мерзімі үштен бірге қысқартылған еді. Енді сот амнистия актісін қайта қолданып, оны дереу босату туралы шешім шығарды.