Ішкі істер министрінің орынбасары, Қылмыстық-атқару жүйесі комитетінің (ҚАЖК) төрағасы Абай Қайырбеков ұлттық экономиканың экс-министрі Қуандық Бишімбаевтың жазасын өтеу тәртібі жайлы айтты, деп хабарлайды Aqshamnews.kz тілшісі Tengrinews.kz тілшісіне сілтеме жасап.
Абай Қайырбековтың сөзінше, Бишімбаев түзеу мекемесінде "басқа сотталғандармен бірдей жағдайда" отыр.
"Бишімбаев қылмыстық-атқару заңнамасының барлық талаптарына сай, өзге сотталғандармен тең негізде жазасын өтеп жатыр", - деді ҚАЖК төрағасы.
Экс-министрдің еңбекке орналасуы мен табысына қатысты сұраққа вице-министр бұл мәліметтер жеке деректер санатына жататынын айтып, туыстары мен адвокаттарына ғана берілетінін жеткізді.
"Жалпы айтарым: біздің мекемелерде сотталғандардың шамамен жартысы еңбекке тартылған. Биыл жұмыспен қамтылғандар санын 3 мың адамға арттырдық, бұл жұмысты жалғастырамыз", - деді ол.
Журналистердің "Бишімбаев жеке камерада отыр ма?" деген сауалына Қайырбеков:
"Айтқанымдай, ол жалпы негізде, басқа сотталғандармен бірге жазасын өтеп жатыр. Аталған сотталғанға қандай да бір ерекше жағдай, жеңілдік немесе арнайы талап қарастырылмаған", - деп жауап берді.
Еске салайық, өткен жылғы 13 мамырда Астанада Салтанат Нүкенованың өліміне қатысты сот процесі аяқталды. Ұлттық экономика министрлігінің бұрынғы басшысы Қуандық Бишімбаев жұбайын азаптап өлтіргені үшін кінәлі деп танылып, 24 жылға бас бостандығынан айырылған еді.